Xilofone
Xilofone (de l griego ξύλον — xylon, "madeira" + φωνή —phonē, "sonido, boç", algo cumo "sonido de la madeira") ye l nome genérico para bários strumientos musicales, mais percisamente idiofones percutidos, que cunsisten an bárias lháminas de madeira çpostas cromaticamente. Antre ls strumientos que se puoden cunsidrar cumo xilofones tenemos l xilofone (propiamente dezido), la marimba, l balafon, etc.
L Xilofone propiamente dezido ye un strumiento musical defenido cumo de percusson, d'altura defenida ó de sonido detreminado.
Apareciu nas orquestras ne l seclo XIX. L xilofone inda nun ye un strumiento mui ousado
Cumpone-se dua sequéncia ourdenada de placas de madeira, çpostas de maneira análoga a las botones dun pianho. Desta maneira, las placas de madeira de sonido mais grabe stan a la squierda de l'eisecutante i, an direçon a la dreita, las notas ban tornando-se agudas.
Hai ua sequéncia de placas an purmeiro praino qu'eiquibalen a las botones brancas de l pianho (notas naturales) i, an segundo praino un pouco mais eilebadas, las placas de madeira qu'eiquibalen a las botones pretas de l pianho (notas acidentadas).
Sob cada placa de madeira, hai un tubo de ressonáncia, giralmente an alumínio, que dá cuorpo al sonido.
Las placas de madeiras son cunfecionadas cun to l smero possible, criteriosamente secas i afinadas cun percison. Tradecionalmente, la madeira scolhida ye l jacarandá (rosewod) mas ne l Brasil ten habido buns resultados cun ipé.
L xilofone apoia-se subre un suporte ó mesa cun rodízios. Percuten-se las placas de madeira usando baquetas, cun cabeças, que puoden ser de madeira dura, de borraixa ó outro material sintético, cunforme l timbre que se querga.
Semelhante al xilofone, la marimba, ten mais botones de madeira mais anchas, nua ária mais grabe.
Precursor de l xilofone, ye l balafon, ouriginairo de África. La defrença esta ne l reduzido númaro de botones i na soluçon de cabaças pa ls ressonadores. Esto eisige un formato curbo i amarraçones an couro i cuordas. Alguns musiqueiros de Jazz ténen demunstrado antresse por este strumiento musical africano, tenendo sido antroduzido an sous trabalhos banguardistas. Atualmente l grupo de rock mais famoso qu'outeliza l xilofone ye l Radiohead, persente an cançones clássicas de ls álbuns Ok Cumputer i In Rainbows.
