Consciencia
Consciencia ta e capacidad mental cu ta permiti e individual pa percibi y procesa e mundo pafo, esta, pa experencia o tin nocion di su mes paden di su medio ambiente.
Terminologia
[editá | editá fuente]Consciencia no tin un definicion acepta den e mundo di ciencia.[2] Na cuminsamento di siglo 21, hopi hende ta usa e termino "consenshi" o "tino" sin problema den idioma diario pa referi na nan propio experencia priva o consciencia. E no ta sinonimo mas cu e termino "mente", cu awor ta encera diferente nificacion y aplicacion. E cambio aki ta debi principalmente na e progreso rapido cu ciencia a haci den comprendemento di funcion di celebro. Por ehempel, e daño cu droga tin riba e celebro o con e cambionan den e actividad di e celnan di e celebro ta coresponde cu cambionan den experencia personal. Apesar di e avance di ciencia, e no a ilumina e naturalesa y origen berdadero di consciencia.[3]
There is nothing that we know more intimately than conscious experience, but there is nothing that is harder to explain.
E profundidad di nos comprendemento ta den nos experencia consciente, sinembargo e ta keda un di e fenomenonan mas dificil pa articula.
—Chalmers (1995)[4]
Etimologia
[editá | editá fuente]"Consciencia" ta un prestamo linguistico di e palabra Latin conscientia cu ta nifica "pa ta consciente den sentido moral". Conscientia a desaroya for di conscire ("ta consciente di bon y malo"), asimilacion di com ("cu") y scire ("conocemento") den Latin.[5]
Problema di consciencia
[editá | editá fuente]E tarea pa compronde y transforma consciencia pa como un modelo di declaracion ta un esfuerso amplio y diverso, tanto den filosofia como den ciencia. E preguntanan relevante ta categorisa bou di tres rubrica crudo como Kico, Con, y Pakico:[6]
- E prgunta descriptivo: Kico ta consciencia? Por ehempel, Kico ta su caracteristicanan principal y cu ki medio nan por wordo descubri, describi, y modela e mas miho.
- E pregunta splicativo: Con consciencia ta opera? Por ehempel, con consciencia por a desaroya for di entidad o procesonan inconsciente.
- E pregunta funcional: Pakico consciencia ta existi? Por ehempel, si ta asina cu consciencia tin un funcion, kico ta su rol y si e ta e caso cu consciencia tin un efecto causal riba e sistema operativo, ora ey con y pakico?
![](https://upload.wikimedia.org/wikipedia/commons/thumb/5/5f/Consciousness_phenomenal-functional_%28pap%29.png/220px-Consciousness_phenomenal-functional_%28pap%29.png)
Tipo y grado di consciencia
[editá | editá fuente]Ned Block a propone un distincion entre dos tipo di consciencia, esta: fenomenal o P-consciencia (Ingles:phenomenal consciousness) y acceso, funcional, o A-consciencia (Ingles:access consciousness).
P-consciencia ta experencia subhetivo, por ehempel color o zonido. E tipo di experencia aki ta considera como independiente di comportacion y no mester tin influencia riba comportacion.[7] Por ehempel, den filosofia di precepto ta invistiga na ki grado calidadnan sensorial subhetivo, manera zonido, holo, o color, por existi den un realidad obhetivo.[8] Steven Pinker ta yama P-consciencia tambe, sentience (den Ingles), cu ta nifica pa tin e capacidad pa sinti cual ta opuesto di capacidad pa pensa (rason).
A-consciencia ta capacidad pa percibi y actua ariba contenido di pensamento y observacion o preceptonan. Esaki ta unicamente posibel pa e acceso cu nos tin pa nos consciencia, por ehempel como hende humano. Segun David Chalmers A-consciencia en relacion cu P-consciencia ta relativamente mas facil pa describi, por ehempel den termino di neurociencia. Ademas, e ta discutibel si e P-consciencia y A-consciencia semper ta bay hunto, cu e pregunta si cada uno lo por existi tambe separa.[7]
Grado di consciencia por varia considerabelmente, for di un estado di coma (sero consciencia) pa un estado di alerta (grado halto di consciencia). Sinembargo, teorianan di consciencia mester supera hopi obstaclo. Por ehempel, tin momentonan ora un individuo aparentemente ta inconsciente di informacion nobo (un cas of cara espantoso), y ainda e tin impacto (activacion di emocion; miedo).[9]
Consciencia den filosofia
[editá | editá fuente]E problema cu consciencia ta purba di contesta ta un di e preguntanan mas bieu den filosofia di mente. Particularmente, e problema di mente cu curpa: Kiko ta e relacion entre fisico y mente?[3] Den otro palabra, tin un espacio metaforico y misterioso entre e curpa y mente, o subhetivo y obhetivo.[10]
Concepto
[editá | editá fuente]Tin varios concepto den filosofia en relacion cu consciencia cu ta hunga un rol significante. Esakinan ta inclui, por ehempel discucion riba problemanan conoci di consciencia, consciencia di animal, consciencia artificial, localisacion di consciencia, consciencia como atributo, qualia, y e pregunta di, si e mundo ta wordo percibi direct o indirect.
Problema di consciencia
[editá | editá fuente]- E problema mente–curpa ta e tema central paden di filosofia di mente, cu ta propone cu aparentemente tin un interaccion inexplicabel meymey di substancia fisico (material; curpa) y no fisico (inmaterial; mento o spirito). Platon ta e prome filosofo occidental pa a anda cu e problema aki.[11] Na siglo 17, René Descartes a amplia y revitalisa e concepto. E problema mente–curpa ta considera como un problema dificil di consciencia.
- E problema dificil di consciencia di David Chalmers a clarifica cu hopi problema den consciencia por wordo categorisa den dos typo di problema: simpel y dificil. E problemanan simpel ta esnan describi den termino di neurociencia. Esakinan ta inclui fenomenonan cu ta asocia cu consciencia, por ehempel, e mechanismo di atencion, control di comportacion, o ritmo circadiano (ciclo di soño y spierto).[12] Na contraste, e asunto cu realmente ta un desafio ta experencia: compronde con ta sinti pa ta un organismo (Con e ta pa ta un raton di anochi?), pa ta den un estado mental specifico (halucinacion), o pa experencia e sensacion di blauw profundo (cuarto di Mary). Specificamente, e problema dificil ta investiga con e procesonan fisico den e celebro ta duna lugar na experencia subhetivo.[13] E existencia di e problema dificil ta controversial y ta wordo cuestiona pa alguna filosofo, manera Daniel Dennett[14], Stanislas Dehaene.[15]
- E problema di otro mente, na mita di siglo 20, a bira un punto di discucion den epistemologia: Con mi sa (o con mi por hustifica e creencia) cu otro sernan ta existi cu tin pensamento, sintimento, y otro atributo mental?[16] E posibilidad di un asina yama zombie filosofico tin biaha ta wordo uza pa enfatisa e problema di otro mente.
![](https://upload.wikimedia.org/wikipedia/commons/thumb/6/62/Solid_red.svg/220px-Solid_red.svg.png)
Subhetividad y qualia
[editá | editá fuente]Qualia ta e calidad distincto o caracter fenomenal di un experencia. E ta principalmente trata di e forma cu un experencia subhetivamente ta presenta su mes na un individuo. E bista di e shelo blauw-ros durante baha di solo o sensacion di bula den laman friu ta un quale. Varios filosofo ta nenga o enfatisa e existencia di sierto propiedad di qualia, pues e naturalesa y existencia di qualia ta controversial. Den su ensayo Quining qualia, Daniel Dennett ta convenci cu no tin propiedad manera qualia.[17]
Lista di fuente
Referencia
|
![]() |
Mira tambe e kategoria Consciousness di Wikimedia Commons pa mas dato mediatiko tokante di e tema aki. |