Kassel'

Kassel'
Kassel
Lidnanznam;	Flag;
Valdkund	Saksanma
Eläjiden lugu (2021)	201,648 ristitud
Pind	106,8 km²
Pämez'	Sven Šoller; (heinku 2023—,; Sven Schoeller)
Telefonkod	+49−561
Aigvö	tal'vel UTC+1,; kezal UTC+2

Kassel' (saks.: Kassel [ˈkasl̩], edel 1926. vot kirjutihe Cassel) om lidn Saksanman keskuzpalas, Gessen-federacijanman pohjoižes.

Istorii

Hassel-lidnusen ezmäine mainitez datiruiše vl 913. Ezimeletaden saksan Chassela-nimituz sündui latinan kelen Castellum Cattorum-sanoišpäi, mi znamoičeb «hattoiden lidnuz», saksalaine hattad-heim eli enččel. Eländpunkt sai lidnan oiktusid vl 1189.

16. voz'sadaspäi Kassel' oli kal'vinistoiden lidnaks kesked katoližid saksalaižid ruhtinazkundoid. Toižen mail'man sodan aigan vn 1943 22. da 23. päivil redukud öl 569 britaništ lendint panihe mantazole lidnan keskusen ühesa kümnendest, 10 tuh. ristituid pölištuihe, 150 tuhad jäihe koditomikš. Lidnan keskuz om saudud 1950-nziden voziden stiliš.

Geografijan andmused

Lidn seižub Ful'd-jogen randoil (saks.: Fulda, Vezeran bassein), hural randal tobman palan. Kassel' sijadase 133..166 m ü.m.t. korktusil tobjimalaz, 615 metrhasai (Hohes Gras-čokkoim). Lähembaine sur' lidn om Göttingen 40 km pohjoižpäivnouzmha.

Vspäi 2013 Vil'gel'mshöe-mägipuišt (saks.: Bergpark Wilhelmshöhe 2,4 km² pindal) mülüb UNESCO:n mail'man jäl'gusen nimikirjuteshe.

Klimat om ven valdmeren, kontinentan valatoitusenke. Sä om pil'vekaz, tal'vel eriližešti. Voden keskmäine lämuz om +9,3 C°, kezakun-elokun +16,1..+18,3 C°, tal'vkun-uhokun +0,9..+1,4 C°. Ekstremumad oma −19,9 C° (tal'vku-uhoku) i +35,2 C° (heinku, eloku). Kezaaigan minimum om +1,2 C° (kezaku), tal'vaigan maksimum om +17,0 C° (uhoku). Ei voi panda halad kezakus-sügüz'kus (sügüz'kun minimum om +0,9 C°). Paneb sadegid 707 mm vodes, läz tazomäras kuidme, enamba semendkus-heinkus (68..74 mm kus) i tal'vkus (68 mm), vähemba sulakus (40 mm). Kun keskmäine relätivine nepsuz vajehtase 69..72 % röunoiš sulakus-elokus, 85..88 % redukus-vilukus.

Tobmuz

Kassel' jagase 23 administrativižeks ümbrikoks (saks.: Ortsbezirk).

Valitas lidnan pämest (saks.: Oberbürgermeister der Stadt Kassel) radnikusele kudeks vodeks. Edeližed lidnan pämehed oma Kristian Gezele (Christian Geselle, heinku 2017 — keväz'ku 2023), Bertram Hil'gen (Bertram Hilgen, keväz'ku 2005 — heinku 2017).

Eläjad

Vn 2011 Saksanman rahvahanlugemižen mödhe lidnan ristitišt oli 191 854 eläjad. Vl 2013 lidnan eläjiden lugu oli 194 087 ristitud, vl 2017 — 200 736 ristitud. Kaikiš suremb lidnan ristitišt oli 225 694 eläjad vl 1943, mugažo 215 039 eläjad vl 1971 sodan jäl'ghe.

Transport

Avtobusad, tramvaid da jogitaksid oma kundaližeks transportaks lidnas.

Kassel'-Vil'gel'mshöe-raudtestancii radab «Gannover — Vürcburg»-kiruhraudtel, mugažo päraudtestancii om saudud.

Irdkosketused

Lidnan tobmuden sait (stadt-kassel.de). (saks.)

Kassel' Vikiaitas