出自維基百科，自由嘅百科全書
節氣係中國古代將一歲（約莫係家下西曆一年）等分做廿四點嘅日，幫助辦別季節時令，助農夫耕田。因為中國紀日係睇月光，唔係太陽，所以節氣響黃曆嘅日子唔係固定，相反，西曆同太陽同步，所以年年節氣日子差唔多。節氣定法分兩種，一種係平氣，即係一歲平均分為廿四分。另一種係定氣，將黃道平分廿四分，用太陽經過節氣角度嗰日來計。由於一歲之中，太陽響黃道行速唔係一樣，所以節氣之間日數差係有唔同。咁樣平氣同定氣計出來嘅係差少少。
節氣分節同氣，節係將黃道十二分，而氣就係節同節中間個位，亦都有十二個。
古人好重視節氣，其中冬至係一歲之日頭最短，畀人定歲首。而夏至係佢嘅相反，一年之中日頭最長。兩個夾埋叫二至。冬至到夏至正中間係春分，夏至到冬至正中間係秋分，呢兩個日夜一樣長，叫二分，跟住冬至到春分中間叫立春、春分到夏至中間叫立夏，夏至到秋分叫立秋，秋分到冬至中間叫立冬。統稱四立。二至二分四立，夾埋就叫八節。
