出自維基百科,自由嘅百科全書
聲樂即係話用人聲嚟製造音樂嘅藝術,通過以發出人聲有關嘅各種技巧去制造音樂。而家嘅聲樂理論,都係由古典歌劇嘅發聲方式,即係由美聲(Bel Canto)嘅基礎上發展出嚟。舊時因為無咪同喇叭,所以唱歌嘅人會通過鼻腔共嗚、口腔肌肉控制等技巧,將把聲推到極限。之後音樂劇興起,又發展出唱低音嘅胸腔共鳴同唱高音嘅頭腔共鳴。中國地方戲曲就多數用一種叫京腔嘅發聲方式,呢啲都係屬於聲樂嘅技巧同內容。
古典歌劇嘅發聲方式起源喺17世紀初意大利,之後由於醫學同解剖學慢慢進步,亦令聲樂以科學化嘅方式,發展出一套完整嘅人聲學問出嚟,呢套技術包括有聲帶張力、腹式呼吸、鼻腔共嗚、胸腔共鳴、頭腔共鳴、轉音、喉結固定、口腔抬高、身體音箱論等。