膥(一般寫成「春」[1]),又叫腎核或者膥子,書面叫睾丸(英文:testis或testicle),係雄性動物生殖器官嘅一部分。摸落似膥(即係蛋)形。生理上係腺體,生精子同分泌雄激素。中醫將性同腎聯想一齊,所以叫腎核。
男人有膥兩粒,屬於一對男性生殖腺,外包係膥袋。兩粒膥可以唔對稱,一邊高、一邊低,一粒大、一粒細係正常,而一般左邊嗰粒較右邊為低。[2]
每粒膥表面覆蓋住一層致密而堅固嘅纖維膜,叫睾丸白膜。白膜深入睾丸實質,將粒睾丸分成過百個睾丸小葉,而每個小葉裏面又含有1至3條曲精細管;男人啲精子就係由曲精細管所產生。精子最後經睾丸輸出小管進入附睾。
曲精細管附近的結締組織入面有間質細胞,為男人分泌雄激素。
膥子喺胚胎初期原位於腹腔後壁,之後跟住胚胎發育逐漸向下移,直到出世前些少先至經腹股溝管降入膥袋。[3]
包圍住粒膥嘅有一層膜叫睾丸鞘膜,由腹膜衍化而成;睾丸鞘膜又分兩層:緊貼睾丸白膜表面嘅叫臟層(lamina parietalis)、襯於陰囊壁裏面嘅叫壁層(lamina visceralis),兩層之間互相連接圍成一個腔隙叫睾丸鞘膜腔(cavum vaginale),正常情況下鞘膜腔內只有少少透明漿液。包繞住睾丸嘅鞘膜係終身保留,但精索嘅鞘膜會喺出世後冇幾耐就逐漸閉鎖並消失,以致鞘膜腔與及腹腔斷絕聯通,不過發育異常者往往因為兩腔相通,導致腹腔內嘅腸管或大網膜墜入膥袋嘅鞘膜腔,形成先天性腹股溝斜疝。
男仔到達青春期時佢兩粒膥子會開始變大;要知道發育成點,可以用量睾器去度下佢哋嘅體積;根據譚納標準,男仔粒膥會由未發育前嘅1.5毫升,增大至喺青春期後嘅近20毫升。另一個得知膥子大細嘅方法,就係度咗粒丸嘅長闊高之後再去計[4]:
膥子專門為男人產生精子同埋有份分泌男性荷爾蒙,所以佢係一個對男人發育、性同生殖嘅關鍵器官。
一般男人喺25到55歲可以製造超過3000億條精子,而男人要製造到精子,粒膥就要低過體溫,所以粒膥要靠精索吊喺體外、由膥袋托住。天口㷫時膥會垂低啲降溫;天氣凍,膥會縮近身取暖。
另外近做愛高潮,膥袋亦會收縮,推粒膥貼近身,避免粒膥撞傷。
有啲臊孲發育唔正常,出生之後睾丸未降夠,就要做睾丸固定術。手術一定要早做,如果超過一定年齡,膥體溫太高,將來製造唔到精子會冇得生,甚至可能有睾丸癌。[5]
睾丸鞘膜腔裏頭因為發炎或者其他原因導致大量積液時,個病叫睾丸鞘膜積液。
睾丸扭曲係屬於急症,即係抽精索扭轉咗,令睾丸靜脈啲血冇辦法流出、動脈啲血又流唔入粒膥,阻礙供血令睾丸壞死。[6]
如果男性成日着緊身褲包實粒膥,提高溫度,就會影響精子嘅質量同數量,跟住影響埋生殖能力。[7]
喺中國古代,皇帝為咗防止男僕同嬪妃做愛,規定渠等一定要切咗膥,先至准入宮做太監;有時,太監重會俾人切晒成條脧。由於膥出雄激素,太監冇咗雄激素,無鬚生、體毛,亦都扯唔到旗。
歐洲古代,亦有啲宗教,有男子詩歌班。爲咗唔會大個變聲,而切咗佢哋嘅膥。必要有膥,先有男人特徵,膥同時會出唔同嘅激素,造成前列腺癌。所以喺醫學上,生前列腺癌,要切膥。
男性有膥兩粒,即使冇咗一粒,男性重可以保持男人特徵。如果膥移植,產生嘅精子,仍有捐贈者基因。
唔單止男人,所有動物嘅公都有膥子作為生殖腺。
-
-
大田鱉(Lethocerus patruelis)嘅兩
粒膥(
標記t)