出自維基百科,自由嘅百科全書
鮑魚(英文:Abalone,英國叫做Ormer),古時叫鰒,又叫鏡面魚、九孔螺、明目魚、將軍帽,係一種海生軟體動物,屬於腹足綱鮑科嘅單殼海生貝類。棲石質河岸,以藻類做食糧。
鮑魚除咗係海中嘅軟體動物之外,亦係中國傳統嘅名貴食材,古時叫鰒魚,山珍海味嘅一種。漢朝王莽就鍾意食鰒魚[1]。曹操鍾意食鰒魚,曹操死後,曹植曾向徐州刺史臧霸要二百隻來祭祀[2]。鮑魚通常喺水溫度比較低嘅海底出產。出產地有日本北部、中國東北部、北美洲西岸、南美洲、南非、澳洲等地。公認最佳產地係日本(乾鮑)同墨西哥(罐頭鮑)。
以鮑魚入饌
鮑魚係四大海味:鮑、參、翅、肚嘅首位。種類繁多,有少部份鮑魚新鮮急凍,亦有製成罐頭,或曬製成乾貨。當中乾鮑按一斤重量有幾多個分為「十頭」、「八頭」等,十頭即係指一斤內有十個。頭數越少,鮑魚越大,亦越昂貴。另外,台灣同中國大陸「斤」嘅定義有分別。喺台灣一台斤係600公克。喺大陸,一市斤係500公克。都係叫「十頭」嘅鮑魚喺大陸會較細,唔少台灣人因此誤會大陸商店呃秤。
上等鮑魚多數會製成乾鮑,當中一種叫做「溏心鮑魚」。「溏心」係指乾鮑中心部份呈唔凝結嘅半液體狀態,將乾鮑煮到中心部份黏黏軟軟,入口時質感柔軟同有韌度,要製作溏心鮑魚需要經過多次曬乾嘅程序。鮮鮑魚並無溏心。新鮮鮑魚多數以清蒸方式處理。
台灣產嘅九孔(Holiotis diversicolor supertexta)又叫台灣珍珠鮑魚、台灣鮑魚、九孔(Taiwanese abalone)。
- ↑ 《漢書·王莽傳》記載:「王莽事將敗,悉不下飯,唯飲酒,啖鰒魚。」
- ↑ 《全上古三代秦漢三國六朝文》卷一五《請祭先王表》:「先主喜食鰒魚,前已表徐州臧霸送鰒魚二百」。