Paul Berg
Paul Berg | |
---|---|
![]() Paul Berg in 1980
| |
Gebore | 30 Junie 1926 Brooklyn, New York |
Alma mater |
|
Bekend vir | Rekombinante DNS |
Vakgebied | Biochemie |
Instellings |
|
Toekennings |
|
Eggenoot | Mildred Levy (g. 1947) |
Kinders | een[3] |
Paul Berg (gebore 30 Junie 1926) is 'n Amerikaanse biochemikus en emeritusprofessor aan die Stanford-universiteit. Hy was die ontvanger van die Nobelprys vir Chemie in 1980, saam met Walter Gilbert en Frederick Sanger.[4][5] Die toekenning het erkenning gegee aan hul bydraes tot basiese navorsing wat nukleïensure behels. Berg het sy voorgraadse opleiding aan die Penn State-universiteit ontvang, waar hy 'n BS in biochemie verwerf het. Hy het sy doktersgraad in biochemie van Case Western Reserve-universiteit in 1952 verwerf. Berg het as professor by beide die Washington University School of Medicine en Stanford University School of Medicine gewerk, sowel as die direkteur van die Beckman Sentrum vir Molekulêre en Genetiese Geneeskunde gewerk. Benewens die Nobelprys, is Berg met die Nasionale Medalje van Wetenskap in 1983 en die National Library of Medicine-medalje in 1986 bekroon. Berg is 'n lid van die Raad van Borge vir die Bulletin of the Atomic Scientists.[Nota 1][6]
Vroeë lewe en opvoeding
[wysig | wysig bron]Berg is in Brooklyn, New York, gebore, die seun van 'n Russiese Joodse immigrantegpaar, Sarah Brodsky en Harry Berg, 'n klerevervaardiger.[7] Berg het in 1943 aan die Hoërskool Abraham Lincoln gegradueer,[8] het sy BS-graad in biochemie aan die Penn State-universiteit in 1948 en sy doktersgraad in biochemie aan die Case Western Reserve-universiteit in 1952 behaal.
![](https://upload.wikimedia.org/wikipedia/commons/thumb/f/f0/DNA_Overview.png/200px-DNA_Overview.png)
Navorsing en loopbaan
[wysig | wysig bron]Akademiese poste
[wysig | wysig bron]Nadat hy sy nagraadse studies voltooi het, het Berg twee jaar (1952–1954) as 'n nadoktorale genoot by die Amerikaanse Kankervereniging deurgebring, en by die Instituut vir Sitofisiologie in Kopenhagen, Denemarke en die Washington University School of Medicine gewerk. In 1954 het hy tyd deurgebring as 'n Geleerde in Kankernavorsing met die Departement Mikrobiologie aan die Washington University School of Medicine.[4] Hy het saam met die Amerikaanse biochemikus Arthur Kornberg gewerk terwyl hy by die Universiteit van Washington werksaam was.[9] Berg was ook aangestel as 'n navorsingsgenoot by Clare Hall, Cambridge.[2][10] Hy was 'n professor aan die Washington University School of Medicine van 1955 tot 1959. Na 1959 het Berg na Stanford-universiteit verhuis, waar hy van 1959 tot 2000 biochemie onderrig het en vanaf 1985 tot 2000 as direkteur van die Beckman Sentrum vir Molekulêre en Genetiese Geneeskunde gedien het.[4] In 2000 het hy uit sy administratiewe en onderwysposte getree en voortgegaan met sy navorsing.[11]
Navorsingsbelangstellings
[wysig | wysig bron]Berg se nagraadse studies het die gebruik van radio-isotoopspoorders behels om intermediêre metabolisme te bestudeer. Dit het gelei tot die begrip van hoe voedsel omgeskakel word na sellulêre materiale, deur die gebruik van isotopiese koolstowwe of swaar stikstofatome. Paul Berg se doktorsgraadtesis is oor die omskakeling van mieresuur, formaldehied en metanol na volledig gereduseerde toestande van metielgroepe in metionien.[Nota 2] Hy was ook een van die eerstes wat gedemonstreer het dat foliensuur- en B12-kofaktore 'n rol speel in dié prosesse.
Berg is waarskynlik die bekendste vir sy baanbrekerswerk wat geensplyting van rekombinante DNS[Nota 3] behels.[12] Berg was die eerste wetenskaplike wat 'n molekule geskep het wat DNS van twee verskillende spesies bevat deur DNS van 'n ander spesie in 'n molekule in te voeg. Hierdie geen-splytingstegniek was 'n fundamentele stap in die ontwikkeling van moderne genetiese ingenieurswese. Nadat hy die tegniek ontwikkel het, het Berg dit vir sy studies van virale chromosome gebruik.[13]
Berg is tans 'n emeritusprofessor by Stanford-universiteit.[4] Vanaf 2000 het hy opgehou om aktiewe navorsing te doen, om op ander belangstellings te fokus, insluitende betrokkenheid by openbare beleid vir biomediese kwessies wat rekombinante DNS en embrioniese stamselle behels en om 'n boek oor genetikus George Beadle te publiseer.[14]
Berg is 'n lid van die Raad van Borge van die Bulletin of the Atomic Scientists.[6] Hy was ook 'n organiseerder van die Asilomar-konferensie oor rekombinante DNS in 1975. Die vorige jaar het Berg en ander wetenskaplikes gevra vir 'n vrywillige moratorium op sekere rekombinante DNS-navorsing totdat hulle die risiko's kon evalueer. Daardie invloedryke konferensie het wel die potensiële gevare geëvalueer en riglyne vir biotegnologie-navorsing opgestel. Dit kan gesien word as 'n vroeë toepassing van die voorsorgbeginsel.[Nota 4]
![](https://upload.wikimedia.org/wikipedia/commons/thumb/d/d8/Queen_Beatrix_meets_Nobel_Laureates_in_1983.jpg/500px-Queen_Beatrix_meets_Nobel_Laureates_in_1983.jpg)
Toekennings en eerbewyse
[wysig | wysig bron]Nobelprys
[wysig | wysig bron]Berg is met die helfte van die 1980 Nobelprys in Chemie bekroon, met die ander helfte deur Walter Gilbert en Frederick Sanger gedeel is. Berg is erken vir "sy fundamentele studies van die biochemie van nukleïensure, met besondere verwysing na rekombinante DNS", terwyl Sanger en Gilbert vereer is vir "hul bydraes rakende die bepaling van basisvolgordes in nukleïensure."[15]
Ander toekennings en eerbewyse
[wysig | wysig bron]Hy is in 1966 verkies as 'n genoot van die Amerikaanse Akademie vir Kuns en Wetenskappe.[16] In 1983 het Ronald Reagan die Nasionale Medalje van Wetenskap aan Berg oorhandig. In 1989 het hy die Goue Plaat-toekenning van die American Academy of Achievement ontvang.[17] Hy is in 1992 tot 'n Buitelandse lid van die Royal Society verkies.[18] In 2005 is die Biotechnology Heritage Award aan hom toegeken deur die Biotechnology Industry Organisation en die Chemical Heritage Foundation.[19][20] In 2006 het hy Wonderfest[Nota 5] se Carl Sagan-prys vir "die gewild maak van wetenskap" ontvang.[21]
Aantekeninge
[wysig | wysig bron]- ↑ Die Bulletin of the Atomic Scientists is 'n niewinsorganisasie rakende wetenskap en globale veiligheidskwessies as gevolg van versnelde tegnologiese vooruitgang wat negatiewe gevolge vir die mensdom inhou.
- ↑ Metionien is 'n noodsaaklike aminosuur by mense en is 'n voorloper van ander aminosure soos sisteïen en taurien.
- ↑ Rekombinante DNS (rDNS)-molekules is DNS-molekules wat gevorm word deur laboratoriummetodes van genetiese rekombinasie (soos molekulêre kloning) wat genetiese materiaal van veelvuldige bronne bymekaarbring, wat stringe skep wat andersins nie in die genoom gevind sou word nie.
- ↑ Die voorsorgbeginsel is 'n breë epistemologiese, filosofiese en regsbenadering tot innovasies met potensiaal om skade te veroorsaak wanneer uitgebreide wetenskaplike kennis oor die aangeleentheid ontbreek. Dit beklemtoon versigtigheid, pouse en hersiening voordat nuwe innovasies begin word wat rampspoedig kan wees. Kritici voer aan dat dit vaag, selfkansellerend, onwetenskaplik en 'n struikelblok vir vordering is.
- ↑ Wonderfest is 'n niewinsorganisasie in Kalifornië wat toegewy is aan informele wetenskaponderrig.
Verwysings
[wysig | wysig bron]- ↑ "Paul Berg + Stanford Biochemistry Department". berg-emeritusprofessor.stanford.edu (in Engels). Geargiveer vanaf die oorspronklike op 19 Februarie 2015. Besoek op 21 April 2022.
- ↑ 2,0 2,1 "Research Focus – Clare Hall". www.clarehall.cam.ac.uk (in Engels). Geargiveer vanaf die oorspronklike op 13 Maart 2018. Besoek op 21 April 2022.
- ↑ Oakes, Elizabeth H. (2007). Encyclopedia of World Scientists (in Engels). New York: Facts on File. ISBN 978-1438118826.
- ↑ 4,0 4,1 4,2 4,3 "Curriculum Vitae - Paul Berg". Nobelprize.org (in Engels). 7 Februarie 2005. Geargiveer vanaf die oorspronklike op 7 Februarie 2005. Besoek op 21 April 2022.
- ↑ "Autobiography - Paul Berg". Nobelprize.org (in Engels). 4 Maart 2006. Geargiveer vanaf die oorspronklike op 4 Maart 2006. Besoek op 21 April 2022.
- ↑ 6,0 6,1 "Guide to the Paul Berg Papers". www.oac.cdlib.org (in Engels). Geargiveer vanaf die oorspronklike op 22 Oktober 2017. Besoek op 21 April 2022.
- ↑ "HowStuffWorks "Paul Berg"". Science.howstuffworks.com (in Engels). 21 Oktober 2008. Geargiveer vanaf die oorspronklike op 20 Mei 2016. Besoek op 21 April 2014.
- ↑ Hargittai, I. (2002). The Road to Stockholm: Nobel Prizes, Science, and Scientists (in Engels). Oxford University Press. p. 121. ISBN 978-0-19-850912-7.
Arthur Kornberg, Jerome Karle, en Paul Berg het almal die Hoërskool Abraham Lincoln in Brooklyn bygewoon.
- ↑ "HowStuffWorks "Paul Berg"". Science.howstuffworks.com (in Engels). 21 Oktober 2008. Geargiveer vanaf die oorspronklike op 20 Mei 2016. Besoek op 22 April 2022.
- ↑ Singer, Maxine; Berg, Pam (1990). Genes and genomes (in Engels). Mill Valley, Ca.: University Science Books. p. xxviii. ISBN 0935702172.
- ↑ Carey, Jr., Charles W. (2006). American scientists (in Engels). New York, NY: Facts on File. ISBN 978-0816054992.
- ↑ "Paul Berg". Science History Institute (in Engels). Geargiveer vanaf die oorspronklike op 21 Februarie 2018. Besoek op 22 April 2022.
- ↑ "Award Ceremony Speech 1980" (in Engels). The Nobel Foundation. Geargiveer vanaf die oorspronklike op 3 Januarie 2011. Besoek op 22 April 2022.
- ↑ "CAP – Paul Berg" (in Engels). Stanford University. Geargiveer vanaf die oorspronklike op 9 Junie 2011. Besoek op 25 Maart 2011.
- ↑ "The Nobel Prize in Chemistry 1980" (in Engels). The Nobel Foundation. Geargiveer vanaf die oorspronklike op 5 Maart 2011. Besoek op 22 April 2022.
- ↑ "Book of Members, 1780–2010: Chapter B" (PDF) (in Engels). American Academy of Arts and Sciences. Geargiveer (PDF) vanaf die oorspronklike op 25 Julie 2011. Besoek op 22 April 2022.
- ↑ "Golden Plate Awardees of the American Academy of Achievement". www.achievement.org (in Engels). American Academy of Achievement. Besoek op 22 April 2022.
- ↑ "Professor Paul Berg ForMemRS" (in Engels). London: Royal Society. Geargiveer vanaf die oorspronklike op 12 November 2015. Besoek op 22 April 2022.
- ↑ "Biotechnology Heritage Award". Science History Institute (in Engels). 31 Mei 2016. Geargiveer vanaf die oorspronklike op 4 Mei 2018. Besoek op 22 April 2022.
- ↑ Gussman, Neil (13 April 2005). "Paul Berg to Receive 2005 Biotechnology Heritage Award". PR NewsWire (in Engels). Geargiveer vanaf die oorspronklike op 21 Februarie 2014. Besoek op 22 April 2022.
- ↑ "Sagan Prize Recipients". wonderfest.org (in Engels). 2011. Geargiveer vanaf die oorspronklike op 12 Augustus 2011. Besoek op 22 April 2022.
Eksterne skakels
[wysig | wysig bron]Wikimedia Commons het meer media in die kategorie Paul Berg.
- Paul Berg vertel oor "Proteinsintese: 'n Epiese verhaal op sellulêre vlak" op YouTube
- Paul Berg se bespreking met Larry Goldstein: "Rekombinante DNS en Wetenskapbeleid" en "Kontemporêre Wetenskapbeleidskwessies"
- Carl Sagan-prys vir die gewild maak van wetenskap toekenning, Wonderfest 2006.
- The Paul Berg Papers – Profiele in Wetenskap, Nasionale Biblioteek vir Geneeskunde
- Paul Berg Papers, 1953–1986 word gehuisves in die Department of Special Collections and University Archives at Stanford-universiteit so Biblioteke