Dag Hammarskjöld
| Dag Hjalmar Hammarskjöld | ||
| ||
| Profesiono: | diplomacisto | |
| Lando: |  Suedia
| |
| Naskodato: | 29 di julio 1905 | |
| Nasko-loko: | Jönköping, Suedia | |
| Mortodato: | 18 di septembro 1961 | |
| Morto-loko: | Ndola, Nordala Rhodezia (nune Zambia) | |
| Retoloko: | https://www.daghammarskjold.se | |
Dag Hammarskjöld (Dag Hjalmar Agne Carl Hammarskjöld) esis chef-sekretario dil Unionita Nacioni de 1953 til 1961, kande lu mortis en aeroplan-acidento, en Afrika. Nuntempe Dag Hammarskjöld esas valorizita kom granda Suedo.
Dag naskis en 29 di julio 1905 en Jönköping, Suedia. Lua patro Hjalmar Hammarskjöld esis prezidanto di kortala tribunalo, pose chefministro di Suedia. Dag kreskis en Uppsala, ube lua patro laboris kom guberniestro.
Dag divenis yuristo ed experteskis kom nacion-ekonomikisto. Il laboris en la rejimo di socialdemokrata Tage Erlander kom exter-partisala ministro, kande ilu nominesis a posteno di la chef-sekretario dil Unionita Nacioni. La rejimo di Suedia ne kampaniis por Dag Hammarskjöld, ma lua “trumpo” esis, ke ilu devenis de sen-koalisinta lando. Ilu juris en l'UN en 10 di aprilo 1953. Kom chef-sekretario dil UN Hammarskjöld sucedis Norvegiana Trygve Lie.
Ante l'ofico en la UN Dag Hammarskjöld laboris en la ministerio dil fiskal aferi, en la ministerio dil exterlandal aferi ed en la centrala banko di Suedia. Dum ca ofici il kreis multa kontakti internaciona, precipue kun Europa.
Ye posmilitala tempo en la mondo dominacis tenso inter la super-povi Usa e Sovietia. Dum la kolda milito Hammarskjöld solvis od entraprezis solvar plu kam 20 krizi internaciona. Ilu koncentris su pri paco entraprezante obstruktar la expanso dil kolda milito ad Afrika ed Azia, ma la nova tereno dil kolda milito favoris Sovietia.
Quankam Dag Hammarskjöld suportis pacal agad, ilu volis, ke UN havus anke militala povo. Il fondis l'unesma paco-sekurinta korpo por UN dum la krizo che Suez en 1956. Hammarskjöld esis tre populara che mikra stati, ed il elektesis nove en 1957. En la generala kunveno dil UN en 1960 Nikita Hrushchyov blamis, ke Hammarskjöld laboris dum la Kongoana krizo tro ocidento-amikale.
Dag Hammarskjöld mortis en aeroplan-acidento ye nokto inter la 17ma e 18ma di septembro 1961. Il esis sur oficala voyo en Afrika dum la Kongoana krizo. L'aeroplano falis proxim l'aeroportuo di Ndola en Zambia an la milito inter ta lando (tatempe Nord-Rhodesia) e Kongo. L'aeroplano pilotesis da Sueda kruo. Pos morto ilu grantesis la Nobel-premio pri paco en 1961.
Plu ne-konocata latero di Dag Hammarskjöld esis, ke il esis anke lirikisto e sidis en l'Akademio di Suedia.
Dag Hammarskjöld esis sucedita da Burmana U Thant, qua laboris til 1971.