Sura Ni'amoni'ö
Sura Ni'amoni'ö (li Indonesia: Kitab Suci) no töi nibe'e ba mbuku fondrege ni'amoni'ö ba zi sambu-sambua agama. Sura Ni'amoni'ö bakha agama Hindu lafotöi ia Weda, bakha ba agama Budha lafotöi Tripitaka, bakha ba agama Islam lafotöi ia Alquran, ba bakha ba agama Yahudi lafotöi ia Tanakh ma Miqra.
Bakha ba agama Niha Keriso to'ölö latötöi manö ia Sura Ni'amoni'ö, ba so khönia bakha zura Amabu'ulali Siföföna (ya'ia da'ö Tanakh ni'oguna'ö ndra niha Yahudi) ba Amabu'ulali Sibohou (nisura ndra solohi khö Yesu aefa wa'amatenia). Ba gotalua Niha Keriso to'ölö wa da'a niŵaö dödöra na latötöi Sura Ni'amoni'ö.
Ba mböröta to'ölö lasura tanga Zura Ni'amoni'ö ba dete garate nifazökhi moroi ba zinumbua sotöi papyrus (moroi ba döi zinumbua andre göi lahalö wehede paper ba li Inggris[1]). Andrö göi wa ebua sibai mböli Zura Ni'amoni'ö ba ambö muzawili ia ba niha ba ginötö da'ö. Bahiza me ngaotu ndröfia si-15 isöndra mesin woraka Johannes Gutenberg. Faoma mesin andre lö sa'ae moguna lasura-tanga hadia ia, irege tola alio sibai wangawalisi sambua buku, ba bölinia göi no tola lakhamö niha sato. Me 1455 iraka Zura Ni'amoni'ö Gutenberg,[2] ba i'otarai da'ö oya sa'ae te'a'asogö Zura Ni'amoni'ö irege alio muzawili ia misa ba niha. Me ibörötaigö nifotöi reformasi Protestan 31 Oktober 1571 Martin Luther, ba no aoha khönia wamazaewe Sura Ni'amoni'ö ba ba wamarou niha wombaso ya'ia.
Sura Ni'amoni'ö Yahudi-Niha Keriso
[bulö'ö | bulö’ö kode]Lafotöi Zura Ni'amoni'ö amabu'ula li, börö me khönia bakha mufatunö gamabu'ula li Lowalangi khö niha ba gulidanö si no ibörötaigö khö Gaberahamo (da'a nifotöi ndra Niha Keriso amabu'ula li si föföna) ba furi hö ibohouni mangawuli bakha ba khö Yesu Keriso (da'a nifotöi ndra Niha Keriso amabu'ula li si bohou), heŵa'ae lö latema ira niha Yahudi wa so gamabu'ula li si bohou.[3][4]
Bahiza tenga ha ba gotaluara niha Yahudi Niha Keriso so gamaehuta wa'oya mbuku bakha ba Zura Ni'amoni'ö awö wamotöi ya'ia. Bakha ba gotalua ndra Niha Keriso samösa so gamaehuta wa'oya mbuku nitema'ö. Andrö wa so mbuku si so bakha ba Zura Ni'amoni'ö Gereja Katolik, bahiza lö ia bakha ba Zura Ni'amoni'ö Gereja Protestan. Hadia mbörönia?
So gamaehuta andrö börö nifotöi otoritas, sangetu'ö hadia mbuku si tola ba si tebai lafaogö bakha ba Zura Ni'amoni'ö. Bakha ba Gereja Katolik si no so i'otarai ndra nifahaö Yesu, si muzawili moroi ba Yerusalema irugi Roma, otoritas andrö ya'ia rafe nifotöi Konsili.[5] Me tebörögö reformasi Protestan ba ndröfi 1517 nidönia'ö Martin Luther, lö latema'ö mato ha'uga mbuku si no so bakha ba Zura Ni'amoni'ö. Andrö mbörö wa abölö oya mbuku bakha ba Zura Ni'amoni'ö Gereja Katolik moroi ba Zura Ni'amoni'ö Gereja Protestan[6][7][8]
Töra ngaotu fakhe awena lasöndra gangetula ira niha Yahudi wanema'ö zi 24 mbuku bakha ba Zura Ni'amoni'ö.
Arakhagö simanö göi bakha ba Gereja Katolik irege te'etu'ö zi 73 mbuku nitema'ö bakha ba Zura Ni'amoni'ö. Tebörögö ia ba Konsili ba Roma me ndröfi 382. Lafaduhu'ö zui gangolita mbuku Zura Ni'amoni'ö andre dania ba Sinode ba Hippo (393), itohugö ba Konsili ba Kartage (397 ba 419), Konsili ba Florence (1431-1449) ba afuriatania ba Konsili ba Trente (1545-1563). Da'a nifotöi Sura Ni'amoni'ö kanonik.[9] Khönia bakha so 46 mbuku si tefaböbö ba Gamabu'ulali Siföföna, ba 27 mbuku si tefaböbö ba Gamabu'ulali Sibohou. Eluahania so fefu 73 buku bakha ba Zura Ni'amoni'ö Gereja Katolik. Sura Ni'amoni'ö kanonik andre la'oguna'ö göi bakha ba Gereja Ortodoks ba ba Gereja Anglikan.
Moroi ba gotalua zi 73 mbuku andrö so mato ha'uga zi lö lafaogö ba Zura Ni'amoni'ö khöra ya'ira gereja-gereja Protestan (faigi tabel sitou).
Ngawalö mbuku ba Zura Ni'amoni'ö
[bulö'ö | bulö’ö kode]Ba da'a tou so gangolifa ngawalö mbuku nifaogö bakha ba Zura Ni'amoni'ö, he nitema'ö niha Yahudi, ba he nitema'ö Gereja Protestan ba Gereja Katolik
| Li Ibrani Tanakh (24 buku) |
Li Yunani
Septuaginta |
Li Indonesia | Li asli tesura ia | |
|---|---|---|---|---|
| Protestan Amabu'ulali Siföföna (39 buku) |
Katolik Amabu'ulali Siföföna (46 buku) | |||
| Huku | Taurat ma Pentateukh | |||
| Beresyit | Genesis | Moze I | Kejadian (fomböi) | Ibrani |
| Syemot | Exodos | Moze II | Keluaran (fa'awu'a) | Ibrani |
| Vayiqra | Leuitikon | Moze III | Imamat (fa'a'ere) | Ibrani |
| Bemidbar | Arithmoi | Moze IV | Bilangan (fangerai) | Ibrani |
| Devarim | Deuteronomion | Moze V | Ulangan (fo'amenesi) | Ibrani |
| Sejarah | Buku sejarah | |||
| Yehosyua | Iesous Naue | Yosua | Yosua | Ibrani |
| Syofetim | Kritai | Sanguhuku | Hakim-Hakim | Ibrani |
| Rut | Routh | Ruti | Rut | Ibrani |
| Syemuel | 1 Basileion | Samueli I | 1 Samueli | Ibrani |
| 2 Basileion | Samueli II | 2 Samueli | Ibrani | |
| Melakhim | 3 Basileion | Razo I | 1 Razo | Ibrani |
| 4 Basileion | Razo II | 2 Razo | Ibrani | |
| Divre Hayyamim | 1 Paraleipomenon | Nga'ötö I | 1 Tawarikh | Ibrani |
| 2 Paraleipomenon | Nga'ötö II | 2 Tawarikh | Ibrani | |
| 1 Esdras | Yunani | |||
| Ezra–Nekhemyah | 2 Esdras | Esera | Ezra | Ibrani ba Aram |
| Nehemia | Nehemia | Ibrani | ||
| Tobit | Tobit | Aram ba Ibrani | ||
| Ioudith | Yudit | Ibrani | ||
| Ester | Esther | Esitera | Ester | Ibrani |
| 1 Makkabaion | 1 Makabe | Ibrani | ||
| 2 Makkabaion | 2 Makabe | Yunani | ||
| 3 Makkabaion | Yunani | |||
| Fa'atua-tua | Buku puisi | |||
| Iyov | Iob | Yobi | Ayub | Ibrani |
| Tehillim | Psalmoi | Sinunö | Mazmur | Ibrani |
| Proseukhe Manasse | Yunani | |||
| Misylei | Paroimiai | Amaedola Zelomo | Amsal | Ibrani |
| Qohelet | Ekklesiastes | Sangombakha | Pengkhotbah | Ibrani |
| Syir Hasyirim | Asma Asmaton | Sinunö Sebua | Kidung Agung | Ibrani |
| Sophia Salomontos | Kebijaksanaan Salomo | Yunani | ||
| Sophia Iesou Seirakh | Yesus bin Sirakh | Ibrani | ||
| Ira sama'ele'ö sebua | Buku ndra sama'ele'ö sebua | |||
| Yesyayahu | Esaias | Yesaya | Yesaya | Ibrani |
| Yirmeyahu | Hieremias | Yeremia | Yeremia | Ibrani |
| Eikhah | Threnoi | Ngenu-ngenu Yeremia | Ratapan | Ibrani |
| Baroukh | Barukh | Ibrani | ||
| Epistole Ieremiou | Yunani | |||
| Yekhezqel | Iezekiel | Hezekieli | Yehezkiel | Ibrani |
| Daniyyel | Daniel | Danieli | Daniel | Aram ba Ibrani |
| Ira sama'ele'ö side-ide | Buku ndra sama'ele'ö side-ide | |||
| Trei Asar | Hosee | Hosea | Hosea | Ibrani |
| Ioel | Yoeli | Yoel | Ibrani | |
| Amos | Amosi | Amos | Ibrani | |
| Obdiou | Obadia | Obaja | Ibrani | |
| Ionas | Yona | Yunus | Ibrani | |
| Mikhaias | Mikha | Mikha | Ibrani | |
| Naoum | Nakhumi | Nahum | Ibrani | |
| Ambakoum | Habakuki | Habakuk | Ibrani | |
| Sophonias | Sefania | Zefanya | Ibrani | |
| Angaios | Hagai | Hagai | Ibrani | |
| Zakharias | Sakharia | Zakharia | Ibrani | |
| Malakhias | Maleakhi | Maleakhi | Ibrani | |
Fangali Zura Ni'amoni'ö ba Li Niha
[bulö'ö | bulö’ö kode]Tebörögö wangali Zura Ni'amoni'ö ba li Niha me i'ali zura Luka ba li Niha Ernst Ludwig Denninger, samösa misionaris Protestan moroi ba Jerman, ba ndröfi 1874. Ibe'e döi zura Luka andrö Turia Amusoladödö Gamonita Tesua wa Luka ba iraka ia "British and Foreign Bible Society", nitohugö dania "Netherlands Bible Society". I'ali zura Luka andre ba dialek Selatan (li raya). Bahiza no ifaruka ira li raya ba li yöu, irege ambö fatema dödö niha wombaso ya'ia.
Awena dania labe'e noro dödö Heinrich Sundermann wangali Zura Ni'amoni'ö ba li Niha (dialek Nias Utara), he Amabu'ulali Siföföna (1910) ba he Amabu'ulali Sibohou (1889). Laraka dania ia ba ndröfi 1911. Ba wangali Zura Ni'amoni'ö andre no fao awö Sundermann Salaŵa Fali'era (Ama Mandranga).[10]
Ba mböröta agama Niha Keriso ba Danö Niha lafotöi Zura Ni'amoni'ö andrö Buku Hia ba gotalua niha raya ba Buku Lowalangi ba gotalua niha yöu.[11] Awena furi hö latötöi manö ia Sura Ni'amoni'ö.
Sura Ni'amoni'ö ba foraka buku
[bulö'ö | bulö’ö kode]Irugi ma'ökhö so töra 5 miliar Zura Ni'amoni'ö si no laraka ba la'öli niha.[12] Ambö töra la'öli niha 100 juta ero röfi,[13] ba no isösö ngawalö hadia ia ba wa'auri niha, töra-töra ba danö Eropa ba ba budaya nifotöi budaya Barat.[14]
Faigi göi
[bulö'ö | bulö’ö kode]Umbu
[bulö'ö | bulö’ö kode]- ↑ Papermaking, britannica.com, mufaigi me 03/12/2023, (Li Inggris).
- ↑ Printing press, britannica.com, mufaigi me 03/12/2023, (Li Inggris).
- ↑ Judaism and Christianity Both Rely on the Hebrew Bible. Why Do They Interpret It So Differently?, time.com, mufaigi me 08/11/2023, ((Li Inggris)).
- ↑ Do Jews and Christians basically have the same religion?, biblica.com, mufaigi me 08/11/2023, ((Li Inggris))
- ↑ Tola tafaedogö zanandrösa ba otoritas andre ba wondrakö ba gotalua Nono Niha. Haniha zi so otoritas wangetu'ö hadia huku (fondrakö) ba hewisa wamatörö ya'ia? Tenga niha si fagölö zangetu'ö ya'ia, bahiza ha niha si so otoritas, ya'ia ndra satua hada/satua mbanua. Simanö göi haniha zangetu'ö hadia mbuku si tola lafaogö bakha ba Zura Ni'amoni'ö. Tenga ero niha zi tola mangetu'ö ya'ia, bahiza ha salaŵa si so otoritas. Bakha ba Gereja Katolik otoritas andrö so ba rafe nifotöi Konsili ndra uskup (fao bakha ba da'ö Paus).
- ↑ Riches, John (2000). "The Bible: A Very Short Introduction". Oxford: Oxford University Press. ISBN 978-0-19-285343-1. nga'örö 7-8 ((Li Inggris))
- ↑ Katolisitas, "Apakah Sola Scriptura/ "Kitab Suci saja" cukup?" (Li Indonesia)
- ↑ Orthodox Info, "Sola Scriptura" ((Li Inggris))
- ↑ Fehede kanonik tewawalö moroi ba li Yunani kanon, eluahania afore (sitobali su'a-su'a). Fagölö geluara wehede standar ba li Indonesia.
- ↑ Dachi, D. K., "Soera Ni'amoni'ö: Alkitab berbahasa Nias" (Li Indonesia)
- ↑ Uwe Hummel, Tuhoni Telaumbanua, Cross and Adu, Boekencentrum, 2007, nga'örö 245.
- ↑ Guinness World Records, Best-selling book, ((Li Inggris))
- ↑ The Economist, The battle of the books, ISSN 0013-0613, ((Li Inggris))
- ↑ The Washington Times, The Bible as cultural influence, ((Li Inggris))