ეთიოპია
ეთიოპიაშ ფედერაციული დემოკრატიული რესპუბლიკა | ||||||
---|---|---|---|---|---|---|
ჰიმნი: Wodefit Gesgeshi, Widd Innat Ityopp'ya |
||||||
ნანანოღა (დო უკაბეტაში ნოღა) | ადის-აბება / | |||||
ოფიციალური ნინა(ეფი) | ამჰარული | |||||
თარობა | საპარლამენტო რესპუბლიკა | |||||
- | პრეზიდენტი | მულატუ ტეშომე | ||||
- | პრემიერ-მინისტრი | ჰაილემარიამ დესალენი | ||||
ფართობი | ||||||
- | გვალო | 1,104,300 კმ2 (27-ა) | ||||
- | წყარი (%) | 0,7 | ||||
მახორობა | ||||||
- | 2015 ფასებათ | 90 076 012 (14-ა) | ||||
- | მეჭედალა | 82.58 ად/კმ2 (123-ა) | ||||
ედპ (ჸუპ) | 2014 ფასებათ | |||||
- | გვალო | $132 მილიარდი | ||||
- | ართ მახორუშე | $1,455 | ||||
აგი (2013) | 0.435[ (დაბალი) (173-ა) | |||||
ვალუტა | ეთიოპური ბირი (ETB ) |
|||||
ბორჯიშ ორტყაფუ | UTC+3 | |||||
- | ზარხულიშ (DST) | +3 (UTC) | ||||
ქიანაშ კოდი | ETH | |||||
Internet TLD | .et | |||||
ოტელეფონე კოდი | +251 |
ეთიოპია (ეთიოპიურო:ኢትዮጵያ), ედომუშამი ოფიციალური ჯოხოდვალა — ეთიოპიაშ ფედერაციული დემოკრატიული რესპუბლიკა (ამჰ. የኢትዮጵያ ፌዴራላዊ ዲሞክራሲያዊ ሪፐብሊክ [je.iːtjoːṗṗjaː feːdeːralaːwiː diːmoːkraːsiːjaːwiː riːpebliːk]), კინოხ თაშნეშე რჩქინელი რდჷ მუჭოთ აბისინია — სქირონათ გოხურგელ სახენწჷფო აფრიკას, სომალიშ ჩქონს (თაშნეშე ჯოხო აფრიკაშ ქა). 90 076 012 ადამიერი მახორობათ, ეთიოპია აფრიკას მაჟირა სახენწჷფო რე თე მაძირაფალით, ნიგერიაშ უკული[1] ფართობიშ მეჯინათ - (1,104,300 კმ²) მავითა. ქიანაშ ნანანოღა - ადის-აბება. ოორუეშე უხურგანს ერიტრეა, ბჟადალშე - სუდანი დო ობჟათე სუდანი, ბჟაეიოლშე - ჯიბუტი დო სომალი დო ობჟათეშე - კენია.
ეთიოპია — ართ-ართ უჯვეშაშ ქირსიანულ ქიანა დო ართ-ართ უჯვეშაშ სახენწჷფო რე მოსოფელს.
ეთიოპია — რანწკი ოერეფოშქაშე ორგანიზაციეფიშ ბრელ ხანიშ მაკათური რე: ქიანა ერეფიშ ლიგაშ მაკათური რდჷ დო ართ-ართ მაართა გოეროშ მაკათური ქიანა რე. თაშნეშე, ეთიოპია აფრიკაშ რსხუშ დჷმარსხუაფალ-მაკათური რე, ოკათჷ ოერეფოშქაშე ორგანიზაცია აკრ-შ ქიანეფs. ლიბერიაწკჷმა ართო დღას ვარდჷ კოლონია.
ჯოხოდვალა
- ოფიციალური: ეთიოპიაშ ფედერაციული დემოკრატიული რესპუბლიკა.
- ეროვნული: Ityopiya, Yeityop'iya Federalawi Demokrasiyawi Ripeblik.
- ეტიმოლოგია: სჯოხო მოურს ლათინურ „Aethiopia“-შე (ძიტყვაშ ჯინჯი ბერძენული რე: aithein „გოჭუალა“ დო ops „სახე“) დო შანენს „უჩეფიშ, გოჭვილეფიშ ქიანას“. იგივე აბისინია, ჯვეშქორთულო “აბაშეთი”. თე ჯოხოს არაბული წმოულობა უღჷ: „ჰაბაშ“ შანენს „ესვარილს“, რმუთ ქიანაშ მახორობაშ ეთნიკურ სიჭარჭულიეს მიოშანუანს.
გეოგრაფია
ეთიოპია იდვალუაფუ ბჟაეიოლ აფრიკას. ქიანაშ მახურგე ქიანეფი რე: სუდანი, ერიტრეა, ჯიბუტი, სომალი, კენია. ქიანაშ ფართობი: 1,104,300 კმ².
რელიეფი
ეთიოპია არძოშე მაღალგვალამი რეგიონი რე აფრიკაშ კონტინენტის. ტერიტორიაშ შანულამ ნორთი უკებჷ ეთიოპიაშ გვალონას, ნამუთ გოძჷ ოორუეშე ობჟათე ეთიოპიშა. გვალონაშ არძოშე მაღალ ნორთი იდვალუაფუ ქიანაშ ოორუეს. თაქ იდვალუაფუ ქიანაშ უმაღალაში კონკა რას-დაშანი (4620 მ) დო ტალო (4413 მ). ბჟაეიოლშე, აფარიშ რეგიონს იდვალუაფუ არძოშე დაბალი კონკა აფრიკას. თაშნეშე, ეთიოპიაშ შანულამ ნორთი უკებ ვაკეეფს, თინეფშე არძოშე დიდი ქიანაშ ბჟაეიოოლს იდვალუაფუ.
კლიმატი
ეთიოპიაშ ედომუშამი ტერიტორია იდვალუაფუ სუბეკვატორულ დო ტროპიკულ კლიმატურ ორტყაფუს.მარა თი ფაქტი, ნამჷ-და ქიანაშ ტერიტორიაშ დიდ ნორთი იდვალაუფუ ეთიოპიაშ გვალონას, ეთმენწყუნს ლიბუ დო ლამე კლიმატის ეთიოპიას. ტემპერატურა ედომუშამი წანმოწანაშ გოძვენას ოშქაშეთ რე +25 °C +30 °C დო გჷნმურს ნოლექეფიშ ობაღებელი მუდანობა. მარა პიჯიშო რე ბჟაეიოლ ნორთის, თექ სინჩხე დო სქირე ტიოზიშ კლიმატი რე.
წყარიშ რესურსეფი
წყარმალუეფიშ დიდ ნორთი ეთიოპიაშ ბჟადლშე ორხველჷ ნილოსიშ ღანჩოს. თაურეშე არძოშე დიდი რე აბბაი კინე ცაშფერი ნილოსი. თაქ რე არძოშე დიდი ტობა ეთიოპიას ტანა. ბჟაეიოლს მერკეთ წყარხვეიანი წყარმალუეფი რე, მუთ მერსხილი რე სქირე კლიმატწკჷმა. ქიანაშ უდიდაში წყარმალუ რე ჯუბა.
ფლორა დო ფაუნა
ობჟათე-ბჟადალ ეთიოპიას იდვალუაფუ არძოშე დიდი ეკვატორული ტყალეფიშ მასივი, ფლორა დო ფაუნაშ უდიდაში მიარეფერუამობათ. XVIII ოშწანურას ქიანაშ დოხოლაფირო გვერდი ტერიტორია უკებუდჷ ტყალეფს, მარა მახორობაშ ძინაშ დპ ოფუტე მეურნობაშ გოვითარაფაშ შედეგო ტყაშ ფართობიქ შანულამო დირკჷ. ტყაშ ფართობიშ დარკებაწკჷმა ართო ჩხოლარეფქ ხოლო დირკჷ. ეთიოპიას ალმახანას შეილებუნა ქოძირათ მუნჭყვეფი, ავაზა, ნჯილო, მელა, ნიანგეფი, ჟირაფეფი, ბეჰემოთი დო მაიმუნეფი. ეთიოპიაშ ოორუე რეგიონს ხე იშვიათი ჩხოლარეფი - ანტილოპა ნიალა დო ეთიოპიური თხა.
მონძალა
- ადის-აბება - იმპერატორიშ დოხორე (XVIII ო.) დო „აფრიკაშ ჸუდე“ (XX ო.)
- აქსუმი - ნანოღალი დო სტელა (II ო.)
- სიმენიშ ერუანული პარკი
- ლალიბელა - კირდეს ეშაჭკირილი ოხიდა (XI ო.)
- გონდერი - ჯიხა (XVII ო.)
რესურსეფი ინტერნეტის
- მუსიკა ეთიოპიას
- ეთიოპიაშ ტრადიციულ მუსიკა
- სურათეფი ეთიოპიაშე
- ეთიოპიაშ რუკა
- აბისინიაშ ისტორია
- ტურიზმი ეთიოპიას
- მასალეფი ეთიოპიაშ უახალაშ ისტორიაშენი
სქოლიო
- ↑ ეთიოპია, მახორობაშ მუდანობათ აფრიკაშ მაჟირა სახენწჷფო რე. Nctimes.com (2007-05-30). კითხირიშ თარიღი: 2010-06-02.