Riekteministtar Leena Meri jáhkká, ahte Sámediggi gal bastá doaimmahit lágas geatnegahtton bargguidis, vaikko Sámedikki boahtte jagi bušeahtas čuhppojuvvoge badjel miljon bealli eret. Stáhta jagi 2025 bušeahttaárvalusa mielde Sámediggi lea massimin kulturiešmearrideapmái oaivvilduvvon ruhtadeamis 568 000 euro.
– Ságastallamiin virgeolbmuid árvalus leamašan, ahte sámedikki lágas meroštallojuvvon doaibma sáhttá dattetge dorvvastuvvot. Muhto doppe maid ferte heivehit doaimmaid, nugo earáge sajiin, dadjá Meri.
Kulturiešmearrideapmái oaivvilduvvon ruhtadeami juolluda riekteministeriija ja boahtte jagi bušeahtas dasa čujuhuvvo 4,4 miljon euro. Sámedikki birrasiid 10 miljovnna sturrosaš bušeahtas riekteministeriija ruhtadan oassi leage stuoris.
Jagi 2025 bušeahta mielde riekteministeriija juolluda veahkkemearreruđaid sierra doaibmiide oktiibuot 10,9 miljon euro. Dás stuorámus oasi váldet Sámediggi ja rihkusoaffarfákten. Dán rádjái riekteministeriijas leamašan geavahusas veahkkemearreruđat 14,1 miljon euro, muhto dál das sihkastuvvo 3,5 miljon euro eret stáhta heajos ruhta dili geažil.
– Sámedikki ja rihkusoaffarfáktema veahkkeruđain čuohpastuvvo prosentuálalaččat uhcit oassi eret go máŋggain earáin, dadjá Meri.
Sámediggi geahččala vel váikkuhit ruhtadeapmái
Sámedikki ságadoalli Pirita Näkkäläjärvi lea sakka behtton bušeahttaárvalussii, go čuohppamat čuhcet garrasit Sámedikki doaimmaide. Ságadoalli leamašange earenomáš fuolas das, ahte mo Sámedikkis basttet čađahit buot lágas mearriduvvon bargguid.
Näkkäläjärvi mielde kulturiešmearrideapmái oaivvilduvvon ruđas máksojuvvojit earret eará čoahkkingolut, ráđđádallamat ja bargojoavkkuide oassálastimat. Seastimat sáhttet váikkuhit maiddái bargovehkii, dasgo ruđain mákset válmmaštalli virgeolbmuid, lávdegottiid áššemeannudeaddjiid ja hálddahusbargiid bálkkáid. Seastimiin sáhttet leat váikkuhusat maiddái Giellagáldu doibmii ja hálddahusgoluide.
Sámedikki hálddahus lea juo giđđat ráhkkanišgoahtán heivehan- ja vuogáiduvvandoaimmaide seastimiid geažil. Dán vahkus Sámedikki sátnejođiheaddjijoavku dolle Helssegii deaivat riikabeaijoavkkuid, politihkkáriid ja maiddái stáhtaministtar Petteri Orpo. Näkkäläjärvi mielde ulbmilin lea vel geahččalit váikkuhit Sámedikki boahtte jagi ruhtadeapmái.
Riekteministtar Meri muittuha, ahte maŋemuš sáni boahtte jagi bušeahtas dadjet riikabeaivvit.
– Ferte muitit, ahte jus juoga sadjái lasiha ruhtadeami, de ferte geahpedit dan gos nu eará sajis, earret jus geavvá nu, ahte riekteministeriija oažžu lasi mearreruđaid. Muhto dat ii leat stáhta ruhtadilis jáhkehahtti, dadjá riekteministtar Leena Meri.
Ráđđehusa bušeahttaságastallan dollojuvvo 3. ja 4. čakčamánu. Stáhta bušeahttaevttohus gieđahallojuvvo ruhtaváljagottis ja stáhtaráđi oktasaščoahkkimis čakčamánu 23. beaivve.
