出自維基百科,自由嘅百科全書
修正早期系統路線圖
修正早期系統(英文:Modified Initial System)係香港地鐵荃灣綫通車前,而家港鐵嘅觀塘綫觀塘站至旺角站(唔包太子站)同荃灣綫旺角站至中環站路段嘅名,嗰陣並唔係單獨咁嗌觀塘綫。而家修正早期系統已分做觀塘綫嘅油麻地至觀塘同荃灣綫嘅旺角至中環段。
1975年11月,修正早期系統批准去起,系統包括觀塘綫(石硤尾至觀塘)同荃灣綫(旺角至中環)兩段。喺隧道工程正式開始前,工程團隊喺沿綫起過4段試挖隧道(分別喺金鐘站東面、而家嘅香港藝術館尖沙咀2號工地、樂富站東面同長沙灣站東面),去評估地質同興建方法。
工程用咗4年,修正早期系統北段喺1979年9月30號進行通車典禮儀式,由時任香港總督麥理浩主持,港督亦行入列車駕駛室做按鈕儀式,之後首班列車就衝過綵帶。車站入面有舞龍舞獅表演。喺石硤尾去程以至觀塘回程時亦有儀式。通車典禮嗰日,有500蚊車飛專畀搭第一班列車。另外有10萬個市民買咗10蚊紀念車飛,可以喺任何車站搭車[1]。