ఈ వృద్ధురాలికి న్యాయం చేయలేరా?

గొలుసు చోరీ కేసును ఛేదించని పోలీసులు
పదేళ్ల నుంచి తిరుగుతున్నా ఫలితం శూన్యం
కడప నేరవార్తలు, న్యూస్‌టుడే

రామసుబ్బమ్మ

నెల కాదు.. ఏడాది కాదు.. దాదాపు పదేళ్ల నుంచి ఆ వృద్ధురాలు ఠాణా చుట్టూ తిరుగుతున్నా పోలీసులు పట్టించుకోలేదు. దొంగ దొరికితే బంగారు దొరకడం లేదు.. బంగారం దొరికితే దొంగ దొరకడం లేదంటూ ఇబ్బందులకు గురి చేస్తున్నారు. దీంతో ఆమెకు న్యాయం చేకూరలేదు. కడప ఎర్రముక్కపల్లెకు చెందిన రామసుబ్బమ్మ 2014 ఆగస్టు 14న నడిచి వెళ్తుండగా గుర్తు తెలియని వ్యక్తులు ద్విచక్రవాహనంపై వచ్చి ఆమె మెడలోని మూడున్నర తులాల బంగారు గొలుసు లాక్కెళ్లారు. వెంటనే ఆమె ఒకటో పట్టణ ఠాణాలో ఫిర్యాదు చేశారు. అప్పట్లో గొలుసు విలువ రూ.50 వేలు. పోలీసులు కేసు నమోదు చేసి దర్యాప్తు ప్రారంభించారు. పదేళ్ల నుంచి ఆమె  ఇటు ఠాణాకు, అటు ఎస్పీ స్పందన కార్యక్రమాలకు వెళ్లి ఫిర్యాదు చేస్తూనే ఉన్నారు. పోలీసులు ఎన్నో కేసులు ఛేదించారు... పోగొట్టుకున్న సొమ్మును బాధితులకు అప్పగించారు. ఈ వృద్ధురాలికి మాత్రం న్యాయం చేయలేకపోతున్నారు. తాజాగా సోమవారం జరిగిన ప్రజా ఫిర్యాదుల-పరిష్కారం వేదికలో ఎస్పీ సిద్ధార్థ్‌ కౌశల్‌ను కూడా బాధితురాలు కలిశారు. ఆయన తిరిగి సంబంధిత ఠాణాకు బదలాయించారు. ఇప్పుడైనా పోలీసులు చర్యలు చేపడతారో లేదా చూడాలి.