出自維基百科,自由嘅百科全書
小磯國昭(日文:こいそ くにあき、新字體:小磯国昭,1880年3月22號—1950年11月3號)係日本政治人兼陸軍軍人,軍階係從二位勲一等功二級陸軍大將。曾經先後出任關東軍參謀長、朝鮮軍司令官、朝鮮總督同拓務大臣,1944年接替因為戰爭失利而辭職嘅東條英機出任首相,由於佢未能夠同國民政府傾掂數,所以響一年後讓位畀鈴木貫太郎。
小磯1880年響栃木縣宇都宮市出世,阿爸小磯進既係山形縣士族(舊新庄藩藩士),亦係前眾議院議員。佢先後就讀新庄小學校、上山小學校、山形中學校(即依家嘅山形縣立山形東高等學校)、陸軍士官學校同陸軍大學校,1901年正式參軍。
1938年畀人編入予備役,一年後隨即出任拓務大臣(第15同第17任)。1942年出任朝鮮總督,沿用返上一任總督南次郎嘅政策,大力推行內鮮一體教育,話「朝鮮人同日本人係同一個民族」,以呢個藉口去打壓朝鮮人嘅抗日行動。佢響朝鮮嘅成績都幾亮眼,仲畀人叫做「朝鮮虎」[1]。
小磯以首相身份到國會發表講話
1944年,日本軍響東條英機嘅帶領下成日打輸仗,6月15號爆發嘅塞班島戰役入面更加死傷慘重,輸到底褲都冇埋,東條被迫辭職。臨走前,佢點名小磯國昭同米內光政做首相候選。響海軍同陸軍嘈完之後,決定由小磯出任首相,米內出任副首相兼海軍大臣。但係小磯冇乜參加過二戰(六年前已經編入予備役),對二戰情況唔熟識,因而多次錯判當前形勢。
國內事務方面,佢話要重視防衛,提出「一億總武裝」計畫。但無幾耐嘅東京大空襲,好多人因為「防空法」(「防空法」即係指市民響空襲嗰陣有義務救人,違者要罰錢)想去救人而死,令到日本國民開始意識到自己畀政府呃咗,唔再相信政府講嘅嘢。小磯內閣嘅公信力跌到好低,支持度亦大跌[2]。
小磯想同美國和談,諗住用雷伊泰灣海戰嚟打擊一下美國士氣、方便談判,點知反而畀美國追住嚟打,日本海軍輸清光,和談唔使諗[1]。
對中國,佢主張用繆斌同國民政府傾掂數;重光葵、杉山元同米內光政表示反對,昭和天皇表示唔信任繆斌,但小磯都係支持佢。最後繆斌傾唔掂數,空手而回,搞到小磯得罪咗好多人。
國內事務搞唔掂,外交又失敗,佢最後被迫響1945年4月7號總請辭,讓位畀昭和天皇嘅心水人選鈴木貫太郎。
1945年8月15號日本宣佈投降,11月19號佢同另外11人先後畀GHQ拉咗,收押響巢鴨監獄。1948年佢畀遠東國際軍事法庭判為甲級戰犯,判終身監禁,兩年後響監獄入面因為食道癌而病死,終年七十歲。
老豆:小磯進(山形縣士族出身,之後當過差、做過眾議院議員)
阿叔:小磯忠之輔(律師、前眾議院議員)
老婆:馨子(新潟縣士族牧口義方第五個女)