Seeŋgâst pajas tijme čiččâm, já masa njuolgist kiirkon iiđeedruhâdâlmân. Návt algii peeivih ko Elli-Då’mnn Aikio, 15, lâi ortodoksilii ristâoppâškoovlâst Uđđâ Valamost Heinävedest.
Aikio muštâl, ete leeirâst lâi suulân kulmâlov nuorrâd kiäh lijjii meddâl pirrâ Suomâ. Nuuvt kuhes mätki pááikán já stuorrâ meeri omâsulmuid hirmástutij. Luhhoost leeirân uásálistij suu ustev Anarist, te aaibâs ohtuu ij tarbâšâm leđe.
– Suottâsumos äšši tobbeen leeirâst lâi tuše čokkáástâllâđ sohvá alne já savâstâllâđ iärásijgijn. Meiddei käägislaavhâ máálám lâi muu mielâst suotâs.
Peiviv koolgâi eelliđ kirhoost kulmâ keerdi
Aikio muštâl, ete iđedist lâi iiđeedruhâdâllâm já tom várás seeŋgâst koolgâi pajaniđ tooláá. Aarrâd moránem tiet jávuttemesvuotâ aalgij tijme love, já talle lâi pyeri leđe jieijâd visteest.
– Ep mij kale moonnâm talle uáđđái. Motomeh miänudii nuuvt, ete leeirâ stivrejeijeeh ferttejii huškođ uuvsâ já pivdeđ sij leđe sijvoost, Aikio povvust.
Tuotâvuotâ tast kale ääigi nuorah monnii uáđđái ij lah almolâš, ige Aikio miettâm kommentistiđ ääši.
Ortodoksilii oskoost ij lah tárbu jotteeđ ristâoppâškoovlâ, ete ličij kirho tievâsjeessân. Ristâoppâškovlâ lii kuittâg šiev vyehi uápásmuđ tärhibávt ooskon já kirholâš siärvusân, sehe teivâđ eres ortodoksilijd nuorâid.
– Mun halijdim moonnâđ ristâoppâškoovlân, ete ožžum toollâđ rippâjuhle já uápásmuđ uđđâ skipárijd.