春秋諸侯
春秋諸侯分佈圖
春秋諸侯大國簡圖
大中華史
-2200 —
–
-2100 —
–
-2000 —
–
-1900 —
–
-1800 —
–
-1700 —
–
-1600 —
–
-1500 —
–
-1400 —
–
-1300 —
–
-1200 —
–
-1100 —
–
-1000 —
–
-900 —
–
-800 —
–
-700 —
–
-600 —
–
-500 —
–
-400 —
–
-300 —
–
-200 —
–
-100 —
–
0 —
–
100 —
–
200 —
–
300 —
–
400 —
–
500 —
–
600 —
–
700 —
–
800 —
–
900 —
–
1000 —
–
1100 —
–
1200 —
–
1300 —
–
1400 —
–
1500 —
–
1600 —
–
1700 —
–
1800 —
–
1900 —
–
2000 —
春秋(粵拼:ceon1 cau1;前770年—前476年/前453年/前403年),又叫春秋時代,係中國史中嘅東周前期,響西周同戰國之間。春秋經常同戰國合埋做春秋戰國,而春秋戰國就介乎於周室東遷同秦朝統一中國之間,而春秋就相當係春秋戰國嘅前半期。
「春秋」嘅名出自孔子修訂嘅《春秋》,呢本書所記嘅時間係魯隱公元年(前722年)到魯哀公十四年(前481年),而而家一般講嘅春秋時代,係從周平王元年(前770年)周室東遷,到周敬王四十四年(前476年)爲止,呢個係《史記》嘅分法[註 1]。亦有人將三家分晉(前403年)當做春秋同戰國嘅界限(《資治通鑒》嘅分法),同時又有人話三家滅智(前453年)時春秋就已經過咗喇。
成個東周都係春秋戰國,意味住周天子失共主約束之力。而啲諸侯無視共主,各自爲政,互相攻伐,取而代之。
當時有啲國實力比較強,恃強凌弱大食細。當中有五君主,圖爲共主而會諸侯,成爲會盟盟主,史稱春秋五霸。呢五霸有講係齊桓公、宋襄公、晉文公、秦穆公、楚莊王。亦有話係吳闔閭、越句踐、吳王夫差。
春秋戰事,尚守禮節。到後尾戰國,就無所不用其極[註 2]。
春秋戰國,以三家分晉爲介,晉國當中三家士大夫,韓、趙、魏瓜分晉國,而同期,齊國由姜姓,落入大臣田氏之手。周天子容許士大夫取而代之。春秋自此結束。亦有人話韓、魏、趙三家圍剿晉國正卿知伯時,晉國就已經係事實上滅亡,而三家成功分立。
自周室東遷雒邑(又叫成周,即洛邑),到秦一統中國期間,係各路諸侯對立紛爭嘅時代,呢個時代嘅前半就係春秋時代。就係從東遷雒邑開始,周朝嘅分封制開始崩潰。周平王之所以要搬趄,係因爲原先嘅都城宗周(鎬京)畀反叛諸侯聯合犬戎嘅軍隊攻破,想避開侵擾而遷都。因爲成周喺宗周東邊,所以遷都後嘅周朝嗌「東周」,而之前嘅嗌「西周」。而啲諸侯之所以反叛,係因爲周幽王嘅統治唔得人心,佢曾經爲咗搏褒姒一笑而「烽火戲諸侯」,激嬲曬啲諸侯、令佢哋反骨。喺殺咗周幽王之後,新立嘅周平王有咗「弒父」之嫌,威望大降,而東遷時平王係得鄭武公護駕,因此鄭國權勢大振,逐漸都睇輕咗周室,周平王都唔忿鄭國咁囂張,想將朝政大權轉畀遞個,鄭公知咗嬲嬲哋,而周天子又唔敢得罪佢,結果周室王子同鄭國王子相互交換押做人質,史稱「周鄭交質」。連周室王子都可以變成人質,周天子嘅地位就一落千丈。前713年,鄭公話宋國無來朝見天子,聯合齊、魯攻宋,大敗宋軍,之後又話戴國、許國唔出兵幫手,滅戴分許,呢件事史稱「以王命討不庭」,自此,諸侯開始攞天子嘅名來爭鬥。周桓王十三年(前707年)因爲邊境糾紛,周桓王帶住班諸侯討伐鄭國,呢場仗史稱「繻葛之戰」,鄭莊公打敗王師不但只,重一箭標正周天子嘅膊頭,史稱「射王中肩」,連傷天子都夠膽,可見周天子已經得番個虛名喇,諸侯就此爭霸。
喺西周時,各諸侯國按禮制分封,分封幾多地、領主屬邊階都有規矩照做,當時有好多諸侯國都係啲小國,屬於封邑,亦即係啲城邦,不過入咗春秋後,啲強國都吞併隔籬嘅小國、弱國,強國嘅面積加大,唔再係城邦,而係變成「領土國」。喺周朝初期,有1800個國,到咗春秋之初,得番124國[2],喺春秋242年嘅亂世當中,43[3]個君主畀臣下或敵國弒殺,亡國嘅有52個,記喺《春秋》度嘅諸侯國有170國[4]。好似晉、楚呢啲強國征服咗啲邦邑後,就喺呢啲地方設縣,直接派自己啲官去治理,而唔係好似之前分封制噉分曬出去[2],即係話當時中國地方政制由分封制逐步轉變爲郡縣制。
除咗由城邦林立演變爲幾個領土國外,政治氣候亦由天下共主演變爲諸侯爭霸。分封制已經敗壞咗,傳統秩序破亂,各國在內篡弒迭生,在外攻伐兼併,夷蠻戎狄亦週不時侵擾中原,局勢好亂。其中一啲諸侯強到直程想去篡奪周室嘅宗主權,不過列國競爭,一時君臨唔到天下,就攞霸主嘅名挾令諸侯[5]。雖然係噉,呢啲霸主重係維持返表面上對周王室嘅尊重、崇拜,以「尊王攘夷」嘅名目來統制中原,所謂「尊王攘夷」,即係攞護衛天子、防範異族入侵嘅名義來會盟[註 3]。其中有5位霸主最有名,稱為春秋五霸。
春秋五霸之首係齊桓公,「尊王攘夷」就係佢倡導嘅,當時佢治下嘅齊國係華夏最強,佢多次會盟,而聯合其他諸侯防範楚國進侵中原。首先前660年,狄人侵邢國,齊桓公聯合宋、曹救邢,擊退咗狄人,不過邢國都城已經燒燬,於是齊國幫佢遷都;無耐狄人又犯,衞國陷落,得七百遺民甩難黃河,齊桓公出兵保存咗衞國,重幫佢起新都,呢兩件事史稱「遷邢存衞」。前656年齊國帶住八國聯軍攻冧楚國盟友蔡國,陳兵楚境,質詢楚國點解唔朝貢天子,最後齊楚講和,喺召陵立盟約,史稱「召陵之盟」。前651年,齊桓公喺葵丘會諸侯,約定「凡我同盟之人,既盟之後,言歸於好」,周天子重派人參加,重賜桓公祭祖時啲肉,講明連周王都認佢做霸主,齊國嘅霸業達到頂峰,呢件事史稱「葵丘之會」。
齊桓公死咗之後,啲仔唔爭氣,齊國內亂而衰弱,楚國呢時稱王,想入中原,宋襄公想學齊桓公噉以反對楚國來會諸侯,不過宋國嘅實力、威望都唔夠。後來宋楚開打泓水之戰,楚國打贏宋國,而宋襄公亦中箭遞年重傷而死,楚成王稱雄一時。呢時就輪到晉國發達,喺前636年,周室內亂,王子帶勾結狄人打周襄王,王師大敗,襄王走難搵秦、晉求救,時任嘅晉文公聽取「求諸侯莫如勤王」嘅建議,飛甩秦國,自己一支公擊退狄人,生擒王子帶交畀襄王,安定咗周室,晉文公獲得「尊王」美譽而聲威大振。前633年,楚國伐宋,宋國向晉國求救,晉文公亦有心稱霸,於是喺被廬練兵,將兩軍擴充爲三軍,史稱「被廬之蒐」,之後喺前632年爲救宋國去打楚國盟友曹、衞,因爲晉國有齊、秦撐佢,楚王都想收兵,不過將領子玉係都想決戰,最後晉文公喺城濮之戰打贏咗,確立佢嘅霸主地位,之後喺踐土會盟,史稱「踐土之盟」。晉文公同齊桓公都係五霸代表,合稱爲「齊桓晉文」。
晉文公死咗後,秦晉之好就係噉先,秦穆公亦都想稱霸中原,不過東有強晉、南有勁楚,於是秦國向西擴張,最後「益國十二,開地千里,遂霸西戎」,連周天子都賜金鼓賀佢。而楚國亦未心死,到楚莊王在位時,改革政治、誅平百蠻,開始用兵中原,再同晉國爭過。前606年,楚莊王討伐陸渾之戎,閱兵周疆,周定王派佢王孫滿去慰問楚軍,呢時楚莊王問王孫滿「九鼎有幾重?」,九鼎係禮器,係傳國之寶,象徵住周王室嘅天子之位,楚莊王去問九鼎嘅輕重,就有想廢周天子而自立嘅意味,係好無視周王室兼極具野心嘅舉動。呢個就係「問鼎」呢個詞嘅來頭,呢件史事有叫「楚莊王問鼎中原」。
之後晉楚相爭。鄭國夾喺晉楚,成為焦點,前597年,楚國話鄭國黐埋晉國得緊要,打佢,最後鄭國都城陷落,屈服於楚,史稱「楚許鄭平」,而場仗嗌做「邲之戰」,自此楚莊王嘅霸主地位確定咗。
春秋時期係從分封制到郡縣制、分封邦邑到郡縣邦國、地方分權到中央集權嘅過渡期[10]。喺春秋中期(前600年前後)中國開始普及鐵製農具[11],噉一來深耕除草就易過舊時,生產效率高過以往,可以擴大咗農業地域,同時鐵器出現有助於水利工程建設[11]。生產率高咗,於是乎促進咗貿易、手工,最後大部份經濟商品化,貨幣原本就有,到咗呢個時代就出現銅錢[11]。因爲商品化、錢銀流通,土地變成可以自由買賣嘅財產,有錢嘅人可以買入大筆地產[11]。西周時嘅經濟係井田制、奴隸制,當時因爲生產力差,耕田就咁多,所以啲田都係公田,然後再將田地分封畀各級貴族;而家因爲生產率高咗,耕完公田可以自己去開私田,噉樣新開嘅田地就唔屬傳統分封嘅土地,而係個人私有,於是慢慢噉出現地主階層。到咗戰國時,鐵器更加普及,於是舊時嘅氏族秩序崩解,促進階級分化。喺土地所有方面,井田制時代田地係公有嘅,係由當地領主安排集體耕作,而春秋時就逐步演變爲土地私有、個體經營;而喺稅制上,原本土地係屬於領主嘅,耕耘所得直接歸領主,而當土地變成個人所有時,稅收對象轉為自耕農。
經濟變革帶來政治變革,即係由原本嘅分封制逐漸中央集權。之所以噉,係因爲經濟發展、經濟商品化爲統治者提供建立中央集權所必須嘅財政資源。因爲新開嘅私田唔屬分封關係內,所以地租直接交入諸侯嘅府庫,而毋須分出啲貢畀上面。此外諸侯爲咗牟利,重壟斷對鹽鐵嘅經營[11]。爲咗可以直接控制更多地方來獲取收入,啲諸侯唔再分封,而係委任官員、設縣、設下級政府來收稅,演變出中央集權嘅政府系統。於是啲諸侯就有足夠嘅財力、勢力去兼併弱國,同時亦有足夠財力來維持呢個中央集權系統。呢個過程其實係慢慢來嘅,從春秋到戰國都係過渡期,而秦國後來可以一統中國,亦係得益於佢哋率先採用呢種中央集權嘅行政系統[11]。
- ↑ 講到儒家史觀,就要提到《春秋》所記嘅最後一件事《獲麟》。呢件事係講魯哀公十四年春,有人獵到隻麒麟。而孔子寫到呢度就停筆。按杜預注解,麒麟係「仁獸」,聖人在位而麒麟出現,係治世嘉瑞;不過當時春秋亂世而有麒麟,就唔多老禮,亦即「感嘉瑞之無應」,於是孔子「傷周道之不興」,就此絕筆。所以「獲麟」呢個詞有封筆嘅含義。春秋之後係戰國,就更加唔興周道,下剋上更頻繁,所以按儒家史觀,春秋同戰國嘅區分在於呢個「下剋上」。關於《獲麟》可査漢典《獲麟》。
- ↑ 2.0 2.1 柳翼謀. 《《中國文化史》》.
周初千八百國,至春秋之初,僅存百二十四國。春秋諸國,吞並小弱,大抵以其國地為縣。因滅國而特置縣,因置縣而特命官,封建之制遂漸變為郡縣之制。
- ↑ 〈中國歷代帝王:春秋時期〉. 原著喺2013年12月26號歸檔. 喺2014年7月16號搵到.
- ↑ 房玄齡. 〈地理志上〉. 《《[[晉書]]》》.
春秋之初,尚有千二百國;迄獲麟之末,二百四十二年,弒君三十六,亡國五十二,諸侯奔走不得保其社稷者不可勝數,而見於《春秋》經傳者百有七十國焉。
- ↑ 〈禮崩樂壞:春秋史大事條列〉. 原著喺2015年6月15號歸檔. 喺2014年7月16號搵到.
- ↑ 〈曲禮下〉. 《《禮記注疏》》.
相見於卻地曰「會」。注:郤,間也。疏:「相見於郤地曰會」者,此謂及期之禮郤間也。既及期,又至所期之地,則其禮閒暇。
- ↑ 7.0 7.1 漢典:歃血
- ↑ 8.0 8.1 8.2 〈曲禮下〉. 《《禮記注疏》》.
蒞牲曰「盟」。注:蒞,臨也。坎用牲,臨而讀其盟書。疏:「蒞牲曰盟」者,亦諸侯事也。蒞,臨也。臨牲者,盟所用也。盟者,殺牲歃血,誓於神也。若約束而臨牲,則用盟禮,故云「蒞牲曰盟」也。……盟之為法,先鑿地為方坎,殺牲於坎上,割牲左耳,盛以珠盤,又取血,盛以玉敦,用血為盟,書成,乃歃血而讀書。
- ↑ 〈曲禮下〉. 《《禮記注疏》》.
然天下太平之時,則諸侯不得擅相與盟。唯天子巡守至方岳之下,會畢,然後乃與諸侯相盟,同好惡,獎王室,以昭事神,訓民事君,凡國有疑,則盟詛其不信者。及殷見曰同,並用此禮。後至於五霸之道,卑於三王,有事而會,不協而盟。
- ↑ 〈讀書網:《中國通史》第三卷上古時代<上冊>·第三節 春秋戰國時期的中國和當時的世界〉. 原著喺2015年9月19號歸檔. 喺2014年7月16號搵到.
- ↑ 11.0 11.1 11.2 11.3 11.4 11.5 Stravrianos. 《《全球通史:從史前史到21世紀》》. 北京大學出版社. pp. 156頁. ISBN 978-7-301-10948-9.